Sosue 21

Lefi -wi" 'a 'blʋa 'a 'blowɔn 'ɔ -gbɛin" 'a "jrukpɔ i -tenyʋ jiɛ 'de 'sraa -sai Eleasa o, Nunɩ 'a "ju Sosue' ke Israɛ -nyʋ 'a -gbɛin" 'a "jrukpɔ i -tenyʋ -sia 'emu o 2 'de Silo, 'de Kanaa blʋa 'di. Ʋʋ 'da ka 'de ʋʋ -pee: Nyɔsoa jaa Moisɩ wlu 'kwa, ɛ 'na ao "nyɩ -a "kwi -kwlɔ -a -jɩ 'di "ti, ɩ ke ɩa' 'kwla -nɩ 'de i ke, -aa "nɔdɩ 'je dɛ di 'emu.

3 Israɛ -nyʋ -sa 'de ʋʋpʋ 'a 'kɛn "kpei "kwi -kwlɔ deejrɩ', ke ɩa' 'blʋa -nɩ 'de i -wɛe ʋʋ "nyɩ Lefi -wi", ka Nyɔsoa "sia ɛɛ' 'nynɩ ɛ.

4 Soa' -poa "i -saa nɔ" -sae' Keatɩ -nyʋ 'a -kwlin. 'De ʋʋpʋ "kwlu ɛ, soa' -poa "nyɩɛ Lefi -wi" -wlʋa 'de 'sraa -sai Aarɔn "ji 'di "kwi -kwlɔ 'ɔ -puue 'jɔ taan 'de Suida o, Simeɔ ke Bɛnsamɛ 'ɛ 'blʋa 'a 'blowɔn 'di. 5 Soa' -poa "nyɩɛ Keatɩ -nyʋ -siae' "kwi -kwlɔ -puue 'de Eflaimʋ ke Dan 'a 'blʋa 'a 'blowɔn ke Manase 'a 'blʋa 'a 'blowɔn 'ɔ tɔo 'di. 6 Soa' -poa "nyɩɛ Kɛɛsɔn nyʋ "kwi -kwlɔ 'ɔ -puue 'jɔ taan 'de Isakaa o, Asɛɛ ke Nɛftali 'a 'blʋa 'a 'blowɔn ke Manase 'a 'blʋa 'a 'blowɔn -tea 'de Basan 'di. 7 Melali 'a -kwlin 'di nyʋ 'jeɛ "kwi -kwlɔ 'ɔ -puue 'jɔ 'sɔɔn ʋʋa' 'de Rubɛnɩ o, Gadɩ ke Sabulɔn 'ɔ 'blʋa 'a 'blowɔn 'di. 8 Israɛ -nyʋ poɛ soa' -wɛe ʋʋ "nyɩ "kwi -kwlɔ -nɩ ke ɩa' 'blʋa nɩ 'de i Lefi -wi", ka Nyɔsoa jaa ɛɛ' wlu Moisɩ 'kwa a

9 "Kwi -kwlɔ ʋʋ -sae' 'de Suida ke Simeɔ 'ɔ 'blʋa 'a 'blowɔn 'di ʋʋ "nyɩa ʋʋpʋ 'de 10 Aarɔn 'ɔ "nynuu 'a -gbɛin" 'di, 'de Keatɩ Lefi 'wlʋa 'a -kwlin 'di. Dɛ-nʋɛ' ʋʋpʋ soa' -poa -sae': 11 Kiriatɩ Aaba, -ɛɛ wɔ -saa' nɩa Aaba 'a "kwi -kwlɔ, Anakɩ -nyʋ -wi" 'a "bɛma, -ɛɛ 'nynɩ nɩa Eblɔn ɛ. Ɛɛ' "kwi -kwlɔ -tu nɩɛ 'de 'blʋa 'a 'fɔ -nɩa 'de Suida 'a crʋɩ 'dii, -wɛe -ɛ -ke -ɛɛ 'blʋa -jiiɛ 'dei ʋʋ "nyɩa ʋʋpʋ ɛ, 12 'kaa -kwlɔ -jɩ "kwi -kwlɔ -nɩa 'mʋa- -mɩ "nyɩɛ Jefune' 'a "ju Kalɛbʋ. 13 Ʋʋa' -nyɩ" 'sraa -sai Aarɔn 'ɔ "ji "kwi -kwlɔ ke ɩa' 'blʋa -jii 'dei -nɩ: Eblɔn -nɩa nyɔ -dba "ku 'a 'kwla pa -kwlɔ ke Libʋna o, 14 Jatii o, Asɩtemoa o, 15 Olɔn o, Debii o, 16 Ainɩ o, Juta ke Bɛtɩ Semɛsɩ ke, "kwi -kwlɔ -mɛ" nyɩɛ ke ɩa' 'blʋa -nɩa 'de Suida ke Simeɔ 'ɔ 'blʋa 'a 'blowɔn 'di ke. 17 'De Bɛnsamɛ 'ɛ 'blʋa 'a 'blowɔn 'di "kwi -kwlɔ ke ɩa' 'blʋa -nɩ 'dei ʋʋ 'jea: Gabaɔn o, Keba o, 18 Anatɔtɩ o, Almɔnɩ o, -mɩ nɩɛ "kwi -kwlɔ -nyiiɛ'. 19 'Sraa -sai Aarɔn 'ɔ "nynuu 'a "ji -mʋ 'a "kwi -kwlɔ ke 'blʋa -nɩ 'dei ʋʋ 'jea bea o ɩ nɩɛ -puue 'jɔ taan.

20 Lefi "ji -nɩa 'de Keatɩ 'a -gbɛin" 'a wɔn 'di soa' pooa 'sʋ -mʋ -wi" 'jeɛ "kwi -kwlɔ 'de Eflaimʋ 'a 'blʋa 'a 'blowɔn 'di 21 ɩ ke 'blʋa ɩ 'blea ke: Sisɛmʋ -ɛ -nɩa 'kwla paana' -kwlɔ 'di, ɛ ke Eflaimʋ 'a 'blʋa -nɩa 'de crʋ 'dii ke, Kesɛɛ ke, 22 Kibʋsaimʋ, Bɛtɩ Orɔn, -mɩ bea o ɩ nɩɛ "kwi -kwlɔ -nyiiɛ'. 23 "Kwi -kwlɔ ke ɩa' 'blʋa -nɩ 'de i ʋʋ 'jea 'de Dan 'a 'blʋa 'a 'blowɔn 'di: Ɛlteke o, Kibletɔn o, 24 Ajalɔn o, Gatɩ Limɔnɩ o, -mɩ nɩɛ "kwi -kwlɔ -nyiiɛ'. 25 'De Manase 'a 'blʋa 'a tɔo 'di, ʋʋ 'jeɛ "kwi -kwlɔ ke ɩa' 'blʋa -nɩ 'de i: Tanakɩ o, Gatɩ Limɔnɩ o, -mɩ nɩɛ "kwi -kwlɔ 'sɔɔn. 26 'De Keatɩ 'a "ji 'a -gbɛin" 'dii "kwi -kwlɔ ke ɩa' 'blʋa -nɩ 'de i ʋʋ 'jea bea o ɩ nɩɛ -puue 'jɔ -mɛ" na.

27 Lefi 'a "nynuu -wlʋa 'de Kɛɛsɔn 'ɔ "ji 'di 'jeɛ "kwi -kwlɔ 'de Manase 'a 'blʋa 'a 'blowɔn 'ɔ tɔo ke ɩa' 'blʋa -nɩ 'dei: Golan -nɩa 'kwla paana' 'de Basan ke Beesɩcrata ke, -mɩ nɩɛ "kwi -kwlɔ 'sɔɔn. 28 'De Isakaa 'a 'blʋa 'a 'blowɔn 'di ʋʋ 'jeɛ "kwi -kwlɔ -nɩ ke ɩa' 'blʋa -nɩ 'dei: Kisiɔnɩ o, Doblatɩ o, 29 Jaamutɩ o, Einɩ Ganimʋ o, -mɩ nɩɛ "kwi -kwlɔ -nyiiɛ'. 30 'De Asɛɛ 'ɛ 'blʋa 'a 'blowɔn ʋʋ 'jeɛ Misealɩ o, Afʋdɔnɩ ke ɩa' 'blʋa -nɩ 'dei ke, 31 Ɛlkatɩ o, Reɔbʋ o, -mɩ nɩɛ "kwi -kwlɔ -nyiiɛ'. 32 'De Nɛftali 'a 'blʋa 'a 'blowɔn 'di: Kɛdɛsɩ -nɩa 'kwla paana' 'de Galile o, Amɔtɩ Dɔɔ ke ɛɛ' 'blʋa -nɩɛ 'dei ke, Kaatanɩ ke ɛɛ' 'blʋa -nɩɛ 'dei ke, -mɩ nɩɛ "kwi -kwlɔ taan. 33 Kɛɛsɔn 'ɔ "ji 'a -gbɛin" 'di ʋʋ 'jeɛ "kwi -kwlɔ 'ɔ -puue 'jɔ taan ke ɩa' 'blʋa -nɩ 'dei ke.

34 Melali 'a "ji 'a -gbɛin" 'di nyʋ 'jeɛ 'de Sabulɔn 'ɔ 'blʋa 'a 'blowɔn 'di, "kwi -kwlɔ ke ɩa' 'blʋa -nɩ 'dei: Jokɩeamʋ o, Kaata o, 35 Dimʋna o, Naalalɩ o, -mɩ nɩɛ "kwi -kwlɔ -nyiiɛ'. 36 'De Rubɛnɩ 'a 'blʋa 'a 'blowɔn 'di 'de Cransisɔɔdani, ʋʋ 'jeɛ "kwi -kwlɔ ke ɩa' 'blʋa -nɩ 'dei: Besɛ -nɩa 'kwla paana' o, Ɩatɩ o, 37 Kedemɔtɩ o, Mefatɩ o, -mɩ nɩɛ "kwi -kwlɔ -nyiiɛ'. 38 'De Gadɩ 'a 'blʋa 'a 'blowɔn 'di ʋʋ 'jeɛ "kwi -kwlɔ ke 'blʋa -nɩ 'dei: Ramɔtɩ -nɩa 'kwla paana' 'de Galadɩ o, Maanaimʋ o, 39 Ɛsbɔn o, Jasɛɛ o, -mɩ nɩɛ "kwi -kwlɔ -nyiiɛ'. 40 Soa' ʋʋ poa, Melali 'a "nynuu 'a "ji 'di nyʋ -nɩa 'de Lefi 'a -kwlin 'di 'jeɛ "kwi -kwlɔ 'ɔ -puue 'jɔ 'sɔɔn.

41 'De Israɛ -nyʋ -siae' 'blʋa 'di, Lefi 'a "nynuu 'jeɛ "kwi -kwlɔ 'ɔ Kwla -nyiiɛ' 'jɔ -mɛ" na ke ɩa' 'blʋa -nɩ 'dei ke. 42 Ʋʋ "nyɩ ʋʋpʋ "kwi -kwlɔ -nɩ -wee' ke ɩa' "nɔdɩ 'a i di na' -nɩa ɩ 'dei 'mɛ.

43 Nyɔsoa "nyɩ 'blʋa -wee' -ɛɛ wlu ɛ cɛan -tie" 'de Israɛ -nyʋ 'a "bɛma -pee 'mɛ. Ʋʋ "duo ɛ 'ʋn 'ɛ -wɛe ʋʋ "tiɛ 'di. 44 Nyɔsoa "nyɩɛ ʋʋpʋ diidɛ 'de ʋʋpʋ tʋnyʋ se ʋʋpʋ o -fʋn' mɔ "pɩ, ka ɛ cɛan ɛɛ' wlu -tie" 'de ʋʋa' "bɛma -pee ɛ, ʋʋpʋ kpa tʋ 'a "jru 'de ʋʋa' tʋnyʋ "kpei, 'de ʋʋa' nyɔ jrɔ' se 'bɛɛ ɔ 'je ʋʋpʋ "juɛi nyna. 45 'Ka ɛ nʋ 'sʋ, dɩ 'dɔe Nyɔsoa 'na ɛ 'je Israɛ -nyʋ "jri i nʋ -wee' je nʋɛ: Dɛjrɛ' se 'de ɩ "kwlu nɩ ɩ se nʋɛ.